အထူး အစီအစဉ်

WordPress ထည့်သွင်းမှု အဆင့်ဆင့် သရုပ်ပြ

WordPress ထည့်သွင်းမှု လုပ်ငန်းစဉ်ကို ရုပ်ပုံသရုပ်ပြများဖြင့် ရှင်းလင်းဖော်ပြပေးပါမည်။

ပထမဆုံးအနေဖြင့် ဤဝဘ်ဆိုဒ်မှ WordPress မြန်မာဘာသာပြန်မူကို ရယူ၍ သင်လွှင့်တင်မည့် ဝဘ်ဆာဗာပေါ်သို့ FTP ပရိုဂရမ် တစ်ခုခုကို အသုံးပြု၍ တင်ပို့ပါ။ ထိုသို့တင်ပို့ပြီးလျှင် သင့်ဆာဗာပေါ်ရှိ WordPress မြန်မာဘာသာပြန်မူကို တင်ပို့ထားသော တည်နေရာသို့ လိပ်စာကို အင်တာနက် ဘရောက်ဇာတွင် ဖွင့်လိုက်ပါက အောက်ပါအတိုင်း တွေ့မြင်ရမည်ဖြစ်ပါသည်။

စနစ်ဖွဲ့စည်းပုံဖိုင် ပြုလုပ်ခြင်း

ထိုအဆင့်ကို ဆက်လက်ပြုလုပ်ပါလျှင် ဒုတိယ အဆင့်အနေဖြင့် အောက်ပါအတိုင်း တွေ့မြင်ရမည်ဖြစ်သည်။

လိုအပ်သော အချက်အလက်စာရင်း

နောက်တစ်ဆင့်ကို ဆက်သွားပါ။ ဒေတာဗေ့ ဆိုင်ရာ အချက်အလက်များ ဖြည့်သွင်းပေးရမည့် စာမျက်နှာကို တွေ့ရပါမည်။ ဒေတာဗေ့ဆိုင်ရာ အချက်အလက်များမှာ သင့်အား ဝန်ဆောင်မှုပေးထားသော ကုမ္ပဏီထံမှ ရယူထားရပါမည်။

ဒေတာဗေ့ ဆိုင်ရာ အချက်အလက်များ ဖြည့်သွင်းမှု

နောက်တစ်ဆင့်သည် WordPress ဒေတာဗေ့များကို သင့် MySQL ဆာဗာသို့ ချိတ်ဆက်မည့် အဆင့်ဖြစ်ပါသည်။

ဒေတာဗေ့ချိတ်ဆက်မှု

ဤအဆင့်တွင် သင့်ဆိုဒ်၏ အမည်နှင့် သင့်သုံးသူအမည် စကားဝှက်တို့ကို ဖြည့်သွင်းပေးရပါမည်။ ဖြည့်သွင်းပြီးလျှင် သင့် WordPress ထည့်သွင်းမှု၏ နောက်ဆုံးအပိုင်းကို လုပ်ဆောင်မည်ဖြစ်ပါသည်။

WordPress ထည့်သွင်းမှု

WordPress ထည့်သွင်းမှု ပြီးဆုံးကြောင်း အသိပေးသော စာမျက်နှာကို တွေ့ရမည်ဖြစ်ပါသည်။ သင့်သုံးသူအမည်နှင့် စကားဝှက်ကို ဖော်ပြပေးထားမည်ဖြစ်သည်။

WordPress ထည့်သွင်းမှု ပြီးဆုံးခြင်း

ထည့်သွင်းမှုပြီးဆုံးပါက ဝင်ရောက်ရန် စာမျက်နှာသို့ ရောက်ရှိပါမည်။

ဝင်ရောက်ရန် စာမျက်နှာ

ထိုစာမျက်နှာမှ တဆင့်ဝင်ရောက်လိုက်လျှင် စီမံအုပ်ချုပ်မှုဆိုင်ရာ ထိန်းချုပ်ခလုပ်ခုံ စာမျက်နှာကို တွေ့မြင်ရမည်ဖြစ်ပါသည်။

ထိန်းချုပ်ခလုပ်ခုံ

WordPress ထည့်သွင်းမှု ပြီးဆုံးသည်နှင့် မြင်တွေ့ရမည့် သင့်ဆိုဒ်၏ နမူနာပုံစံမှာ အောက်ပါအတိုင်းဖြစ်ပါသည်။

ဆိုဒ် နမူနာပုံစံ

WordPress ၃.၈

၂၀၁၃ ခုနှစ်ကုန်ခါနီး ဒီဇင်ဘာလအတွင်းမှာပဲ WordPress ဘာသာပြန် ၃.၆ ၊ ၃.ရ ကို တစ်လအတွင်း ဆက်တိုက် ထုတ်ပေးဖြစ်ခဲ့ပါတယ်။ ၃.ရ ထုတ်ပေးပြီးလို့ မကြာခင်မှာပဲ ၃.ဂ ဟာ ပြောင်းလဲမှု များစွာနဲ့အတူ ထပ်မံ ထွက်ရှိလာပါတယ်။ ဒါနဲ့ ၃.ဂ ကိုလည်း ၃.ရ ထုတ်ပေးခဲ့တဲ့ ရက်သတ္တပတ်အတွင်းမှာ ပြီးစီးအောင် လုပ်ခဲ့တယ်။ ထုတ်ပေးဖို့ကိုတော့ အမှတ်တရဖြစ်အောင် ဒီလအတွင်းမှာ ကျရောက်မယ့် ခရစ္စမတ်နေ့နဲ့ နှစ်သစ်ကူးနေ့တွေအပြင် 2013 SEA GAMES ပိတ်ပွဲကိုပါ ထည့်သွင်း စဉ်းစားခဲ့ပြီး ယနေ့ကျရောက်တဲ့ 2013 SEA GAMES ပိတ်ပွဲကို ရွေးချယ်ခဲ့တယ်။

Charlie Parker ကို အစွဲပြုပြီး Parker လို့ အမည်ပေးထားတဲ့ WordPress ၃.ဂ မှာ ဘာတွေ ပြောင်းလဲလာသလဲဆိုတော့ –

ခေတ်သစ် အနုအလှ

WordPress ၃.ဂ ခေတ်သစ်အနုအလှ
WordPress ၃.ဂ ဟာ အရင် ဗားရှင်းတွေနဲ့မတူ တမူထူးခြားတဲ့ ထိန်းချုပ်ခလုပ်ခုံ အသွင်အပြင်နဲ့ မိတ်ဆက်ပေးခဲ့တာပါ။ ရိုးရှင်းမှုနဲ့သပ်ရပ်မှုကို အသားပေးထားပြီး သစ်လွင်စနစ်ကျတဲ့ ဒီဇိုင်းကို WordPress အသစ်ရဲ့ ထိန်းချုပ်ခလုပ်ခုံမှာ ထည့်သွင်းထားပါတယ်။ Icon တွေကိုလည်း ပုံတွေအစား Icon Font တွေနဲ့ အသုံးပြုထားပါတယ်။ ယခင် ၃.ရ မှာလည်း Icon Font တွေကို အသုံးပြုခဲ့ပါတယ်။

WordPress ၃.ဂ ဒီဇိုင်း

ရှင်းလင်းသော စာလုံးပုံစံ

စားပွဲတင်ကွန်ပြူတာနှင့် မိုဘိုင်းကိရိယာများမှကြည့်သောအခါ အကောင်းဆုံးအနေအထားဖြစ်တဲ့ Open Sans စာလုံးများကို ရိုးရှင်းပြီး ရင်းနှီးသည့် စာသားများမှာ အသုံးပြုထားပါတယ်။

အချောသတ် ပြတ်သားမှု

လှပတဲ့ ဒီဇိုင်းတစ်ခုအတွက် အထူးဂရုပြုပြီး ကြည့်ရှုနေစရာ မလိုတော့ပါဘူး။ ပြတ်သားကြည်လင် ကြီးမားပြီး သက်တောင့်သက်သာရှိသော ပုံစံနဲ့ ဒီဇိုင်းအသစ်က ဖတ်ရန်လွယ်ကူပြီး သွားလာဖို့ လွယ်ကူစေပါတယ်။


WordPress ၃.ဂ Responsive

ကိရိယာအားလုံးပေါ်မှ WordPress

အင်တာနက်ကို နည်းလမ်းမျိုးစုံနဲ့ ကျွန်တော်တို့ အသုံးပြုကြပါတယ်။ စမတ်ဖုန်း၊ တက်ဘလက်၊ နုတ်ဘုတ်၊ စားပွဲတင်ကွန်ပြူတာ — ကဲယခု သင့်ဘာပဲသုံးသုံး WordPress က အလိုလို အဆင်ပြေစေဖို့ ထိန်းချုပ်ခလုပ်ခုံကို Responsive ဒီဇိုင်းအနေနဲ့ ၃.ဂ မှာ ဖန်တီးထုတ်လုပ်လိုက်ပါပြီ။

အရည်အသွေးမြင့် မြန်နှုန်းမြင့်မြင့်

ဖန်သားပြင်အလိုက် စကေးကိုက်ဖော်ပြနိုင်တဲ့ ဗက်တာအခြေခံ သင်္ကတေပုံများနဲ့ WordPress ဟာ အရင်ကထက် ပိုမို ပြတ်သားကြည်လင်လာပါတယ်။ ပစ်ဇယ်များအား အပြောင်းအလဲပြုလုပ်ခြင်းဖြင့် စာမျက်နှာများ ဖွင့်လှစ်ချိန်မှာလည်း အတော်လေး ပိုမိုမြန်ဆန်လာပြီဖြစ်တယ်။

 


 

ထိန်းချုပ်ခလုပ်ခုံ အရောင်ရွေးရန်

WordPress ထိန်းချုပ်ခလုပ်ခုံ အရောင်
ထိန်းချုပ်ခလုပ်ခုံကို အရောင်အသွေး စုံလင်စွာနဲ့ မြန်ဆန်လွယ်ကူအောင် အသုံးပြုနိုင်ဖို့ MP6 လို Plugin ကို မေ့ထားလို့ ရပါပြီ။ MP6 ရဲ့ဖန်ရှင်တွေဟာ WordPress ၃.ဂ မှာ အသင့်ပါလာပြီပဲ ဖြစ်ပါတယ်။ အရောင်အတွဲအစပ်ကို ပြောင်းလဲဖို့ ကိုယ်ရေးမှတ်တမ်းမှာ သွားရောက်ရွေးချယ်နိုင်ပါတယ်။


ဆန်းသစ်သော အခင်းအကျင်း စီမံခန့်ခွဲမှု

responsive

နောက်ထပ် ပြောင်းလဲမှု တစ်ခုကတော့ အခင်းအကျင်း စာမျက်နှာပါပဲ။ လျှင်မြန်စွာ စမ်းသပ်စစ်ဆေး နိုင်ဖို့များစွာ ပြုပြင်ထားပါတယ်။ အခင်းအကျင်းတစ်ခုကို စီမံခန့်ခွဲဖို့ ကလစ်တစ်ချက်သာ နှိပ်လိုက်ရုံပါ။ အခင်းအကျင်း တစ်ခုနဲ့တစ်ခုကို ကီးဘုတ်က မြားလေးတွေ အသုံးပြုပြီး ရွှေ့ပြီး ထည့်ထားသမျှ အခင်းအကျင်းတွေကို ကြည့်ရှုနိုင်မှာပဲ ဖြစ်ပါတယ်။

ဝစ်ဂျက်တွေကို စီမံဖို့ ရှုပ်ထွေးနေသလား။ ၃.ဂ မှာ ဒီဇိုင်းအသစ်နဲ့ ပိုမိုလွယ်ကူ ချောမွေ့စေဖို့ ဖန်တီးပေးထားပါတယ်။ ကြီးမား ကျယ်ပြန့်တဲ့ မော်နီတာတစ်ခုသာ ရှိပါစေ။ လွတ်နေတဲ့ နေရာတွေမှာ ဝစ်ဂျက်ဧရိယာတွေကို တစ်ခုနဲ့တစ်ခု ဘေးချင်း ယှဉ်ထားနိုင်ဖို့ စီစဉ်ပေးထားပါတယ်။ တက်ဘလက်နဲ့ အသုံးပြုနေတာလား။ ထည့်လိုတဲ့ ဝစ်ဂျက်ကို ထိရုံနဲ့ပဲ ထည့်သွင်းနိုင်ပါတယ်။


 

Twenty Fourteen အခင်းအကျင်းအသစ်

နှစ်ဆယ် ဆယ့်လေး

Twenty Fourteen ဆိုတဲ့ အခင်းအကျင်းအသစ်ကို ၃.ဂ မှာ ထည့်သွင်းပေးလိုက်ပါတယ်။ အရင်လို ဘလော့ဂ်ပုံစံ အသားပေးမဟုတ်ပဲ မဂဇင်း ဒီဇိုင်းအသစ်နဲ့ပဲ ဖြစ်ပါတယ်။ ဦးစားပေး အကြောင်းအရာတွေကို ဖော်ပြဖို့အတွက် စလိုက် သို့မဟုတ် အကွက်တစ်ခုကို ရွေးချယ်နိုင်ပြီး ဝစ်ဂျက်ဧရိယာ သုံးခုနဲ့ စိတ်ကြိုက် ပြုပြင်နိုင်ပါတယ်။ ဒါမှမဟုတ် စံပုံစံ နှစ်ခုပါတဲ့ စာမျက်နှာ တန်းပလိတ်နဲ့ နေရာချထားမှုတွေကို ပြောင်းလဲနိုင်ပါတယ်။

ယခု ၃.ဂ မြန်မာဗားရှင်းမှာတော့ ဘာသာပြန်အပြင် အင်္ဂလိပ်ဂဏန်းများကိုပါ မြန်မာလို ဖြစ်အောင် ပြုလုပ်ပေးထားပါတယ်။

WP 3.4.2

WordPress ကို ၃.၄ ထွက်ထွက်ခြင်းမှာ ထုတ်မပေးနိုင်ခဲ့ပါဘူး။ ဘာသာပြန်တာ အပြီးမသတ်သေးတာကြောင့်ရော။ ပလပ်အင်တစ်ခု ရေးနေတာ မပြီးသေးတာကြောင့်ရော မထုတ်ပေးခဲ့တာပါ။ ခုတော့ ayar-web-kit ဗားရှင်း ၁.ဝ ဟာ ပြီးလုပြီးခင် အခြေအနေကို ရောက်လာပြီဖြစ်တာကြောင့်ရော၊ ဘာသာပြန်တာကို ဒီနေ့ပဲ ပြီးအောင် ပြန်နိုင်ခဲ့တာရော၊ ထုတ်ပေးဖြစ်ခဲ့ပါတယ်။ ဒါပေမယ့် ဒီနှစ်ချက်က ထုတ်ပေးဖြစ်တဲ့ အဓိက အချက်မဟုတ်သေးပါဘူး။ တကယ်တော့ ayar-web-kit နဲ့သာ တူတူထုတ်ဖို့ စဉ်းစားခဲ့တာပါ။ ခု ထုတ်ပေးလိုက်ဖြစ်တာကတော့ ဒီကနေ့ဟာ ခု WordPress ဘာသာပြန်တဲ့နေရာမှာသုံးထားတဲ့ ဧရာ ယူနီကုဒ်ကို ထုတ်ဝေခဲ့တာ ၃ နှစ်ပြည့်တဲ့နေ့ဖြစ်ပါတယ်လို့ ဧရာ အုပ်စုက ပြောလာတဲ့အတွက် အမှတ်တရ အနေနဲ့ WP 3.4.2 ကို ဖြန့်ချိခဲ့တာဖြစ်ပါတယ်။

ayar-web-kit ကို ဘာလို့စောင့်မယ် စိတ်ကူးခဲ့လဲဆိုတော့ အဲဒါကို သုံးထားရင် WordPress သုံးတဲ့သူတွေအနေနဲ့ ဧရာ၊ ဇော်ဂျီ၊ မြန်မာ၃ ကြိုက်ရာကို ရွေးချယ် အသုံးပြုနိုင်မှာဖြစ်ပြီး ဖတ်ရှုသူအနေနဲ့လည်း ကြိုက်ရာနဲ့ရွေးချယ်ဖတ်ရှုနိုင်ပါမယ်။ နောက်တစ်ချက် ဧရာနဲ့ မြန်မာ ၃ တို့နဲ့ ရေးထားတာတွေကို ဖတ်မရဘဲ ဇော်ဂျီနဲ့သာ ဖတ်ရတဲ့ မိုဘိုင်း ပစ္စည်းတွေမှာ ဘလော့ဂ်ရေးသူက ဘာနဲ့ရေးထားထား ဇော်ဂျီနဲ့ အလိုလို ပြောင်းပြပေးပါမယ်။ နောက်ဆုံးအဓိကကျတဲ့ စနစ်တစ်ခုကတော့ google တို့လို နာမည်ကြီး search engine တွေရဲ့ spider ပရိုဂရမ်တွေက လာရောက်ဖတ်ရှုတဲ့အခါမှာတော့ မြန်မာ ၃ ကို default အနေနဲ့ ပြပေးဖို့လုပ်ထားပါတယ်။ နောက်ပိုင်းမှာတော့ ဧရာ၊ ဇော်ဂျီ တို့နဲ့ပါ index လုပ်ခိုင်းတဲ့ အထိလုပ်မယ်လို့ စိတ်ကူးထားပါတယ်။ အဲဒါအပြင် အသံထွက်လို့ရတဲ့ စာလုံးတစ်ခုတိုင်းကို စာလုံးဖြတ်ပေးမယ့် word break စနစ်ကိုလည်း ထည့်ပေးထားပါတယ်။

၃.၂

WordPress ၃.၂ ကို ဒီနေ့မနက်ပဲ ထုတ်ပေးလိုက်ပါတယ်။ ပြင်ဆင်စရာတွေများတာက တစ်ကြောင်း။ အမှားမပါအောင် သေချာ စစ်ဆေးချင်သေးတာ တစ်ကြောင်းကြောင့် မူရင်း အင်္ဂလိပ် ဗားရှင်းထွက်ပြီး ချင်းချင်း မထွက်ပေးနိုင်ခဲ့ပါဘူး။ တစ်ရက်နောက်ကျပြီးမှ ထွက်ပေးနိုင်ခဲ့ပါတယ်။ အခု ၃.၂ မှာ အရင် Glotpress မှာ အခြားသူတွေဘာသာပြန်ထားတာကို ယူသုံးထားတဲ့ ဘာသာပြန်တွေထဲက အမှားတော်တော်များများကိုရော ကျွန်တော် ဘာသာပြန်ပြီး သိပ်အဆင်မပြေဘူးထင်တာတွေကိုရော တတ်နိုင်သမျှ ပြန်လည် ပြင်ဆင်ပေးထားပါတယ်။ အခု အခါမှာ ၉၅% ကျော်တော့ အဆင်ပြေကောင်းမွန်တဲ့ အနေအထားတစ်ခုကို ရောက်ပြီလို့ ထင်ပါတယ်။ နောက် ၃.၃ ဒါမှမဟုတ် ၃.၄ မှာ တည်ငြိမ်တဲ့ ဗားရှင်း တစ်ခုကို ထုတ်ပေးနိုင်ဖို့ မျှော်လင့်ပါတယ်။ WordPress ဘာသာပြန်တာ တည်ငြိမ်သွားပြီဆိုတာနဲ့ တစ်ခြား CMS တွေဖြစ်တဲ့ ဂျွန်မလာတို့ကိုပါ ဆက်လက် လုပ်ဆောင်သွားဖို့ ရည်ရွယ်ထားပါတယ်။ လက်ရှိမှာ Ayar Web Kit ကို ၃.၂ နဲ့ အဆင်ပြေအောင် အသစ်ပြင်ဆင်ထားခြင်းမရှိသေးပါဘူး။ ဒါကြောင့် စမ်းသပ်သုံးစွဲလို့ အဆင်မပြေတာရှိရင် Ayar Web Kit ကို ခေတ္တ ပိတ်ထားဖို့ အကြံပြုပါတယ်။ သိပ်မကြာခင် ကာလအတွင်း အဆင်ပြေတဲ့ ဗားရှင်းတစ်ခု ထုတ်ပေးဖို့ ကြိုးစားနေပါတယ်။

၃.၁.၄

၃.၁.၄ ကို ဒီနေ့ဖြန့်ချိပေးလိုက်ပါတယ်။ ၃.၂ အတွက် ပြင်ဆင်ထားတဲ့ အမှားပြင်ဆင်ချက်တွေကိုပါ ပေါင်းထည့်ပေးထားပါတယ်။ ၃.၂ လဲ မကြာမှီမှာ ထွက်လာတော့မှာ ဖြစ်ပါတယ်။ အခု RC-3 ကို ရောက်ပါပြီ။ RC-3 ကို မြန်မာဘာသာနဲ့တော့ ထုတ်မပေးသေးပါဘူး နောက်ပိုင်း ဗားရှင်းတွေဆိုရင်တော့ ဘီတာနဲ့ အာစီတွေပါ ထုတ်ပေးနိုင်အောင် ကြိုးစားပါမယ်။ ၃.၂ ထွက်တဲ့အခါ bbPress ဖိုရမ်အတွက် ပါထုတ်ပေးနိုင်ဖို့ ကြိုးစားပါမယ်။ bbPress က ဖိုရမ်တစ်ခုလုပ်ဖို့အတွက် အလွန်လွယ်ကူပါတယ်။ ၃.၂ ထွက်တဲ့အခါ ဧရာ ဝဘ်ကစ်ကို ပိတ်ထားပြီးမှ update လုပ်ကြဖို့ အကြံပြုပါတယ်။ ဧရာ ဝဘ်ကစ်ကို အသစ်ပြင်နေတာ မပြီးသေးတဲ့အတွက် ၃.၂ နဲ့ အဆင်မပြေတာတစ်ချို့ရှိနေပါတယ်။ ၃.၂ ထွက်တဲ့အခါ အသုံးပြုလို့ရမရကို တစ်ခါတည်း ကြော်ငြာပေးပါမယ်။

WordPress ၃.၁.၃

WordPress ၃.၁.၃ သည် ၃.၁ ၏ နောက်ထပ် လုံခြံရေး ပြင်ဆင်ဖြည့်စွက်ချက်တစ်ခုဖြစ်ပါသည်။ အဓိက လုပ်ဆောင်ချက်များကို ပြောင်းလဲထားခြင်း မရှိပါ။ သင့် ဆိုဒ်ကို ဟက်ကာများမှ ဟက်၍ တစ်ခုခု ပြုလုပ်နေသည်ဟု သံသယ ရှိပါက အမြန်ဆုံး အဆင့်မြှင့်တင်သင့်ပါသည်။ WordPress မြန်မာဘာသာပြန်အဖွဲ့ မှ အချိန်နှင့်တစ်ပြည်းညီ နောက်ဆုံး အဆင့်မြှင့်တင်မှုများကို ရရှိနိုင်ရင် ကြိုးပမ်းဆောင်ရွက်နေပါသည်။ WordPress ၃.၂ ကို နောက်လကုန် တွင် ဖြန့်ချိနိုင်ရန်လည်း WordPress Core Team မှ အထူးကြိုးပမ်းဆောင်ရွက်နေပါသည်။ https://wordpress.org/news/2011/05/wordpress-3-1-3/ တွင် ၃.၁.၃ ထွက်ရှိမှုနှင့် ပတ်သက်သည့် မူရင်း ကြော်ငြာချက်ကို ဖတ်ရှုနိုင်ပါသည်။ ဤဗားရှင်းတွင် ပါဝင်ဆောင်ရွက်သူများ စာရင်းကို https://mya.wordpress.org/wp-admin/credits.php တွင် ကြည့်ရှုနိုင်ပါသည်။

၃.၁.၁ ဖြန့်ချိမှု

WordPress ၃.၁.၁ ကို ဆက်လက်၍ ဖြန့်ချိန်ပေးလိုက်ပါသည်။ ဗားရှင်း ၃.၁ ၏ လုံခြုံရေးဆိုင်ရာ ဖြည့်စွက်ပြင်ဆင်ချက်များကို အချိန်နှင့်တစ်ပြေးညီ ရရှိနိုင်ရန် ကြိုးစားပေးထားပါသည်။ မူရင်း WordPress ၏ ဗားရှင်း ၃.၁.၁ ဖြန့်ချိမှုကို ကြော်ငြာချိန်မှ နာရီပိုင်းအတွင်း မြန်မာဘာသာပြန်မူကိုပါ ဗားရှင်း ၃.၁.၁ ကို ပြောင်းလဲ ပြင်ဆင်ဖြည့်စွက်ပေးထားပါသည်။ ဗားရှင်း ၃.၁ တွင် ပလပ်အင်အချို့နှင့် အဆင်မပြေမှုများရှိပါက အမြန်ဆုံး ၃.၁.၁ သို့ အဆင့်မြှင့်တင်သင့်ပါသည်။ WordPress ၃.၁.၁ ဖြန့်ချိမှု သတင်းကို https://wordpress.org/news/2011/04/wordpress-3-1-1/ တွင် သွားရောက်ဖတ်ရှုနိုင်ပါသည်။

ဧရာ ဘာကြောင့်သုံးလဲ Why Ayar ?

ဧရာ ဘာကြောင့်သုံးလဲ သိချင်ကြရင် http://atp.ayar.co/2011/03/25/why-used-ayar-in-wordpress/ မှာ ရေးထားပါတယ်။ အဲဒီမှာဖတ်ကြည့်ကြပါ။ အဲဒီမှာ ပြောထားတာတွေကို ဧရာအပါအဝင် ယူနီကုတ်သမားတွေအကုန်လုံး ဝိုင်းပြီးဖြေရှင်းနိုင်ပြီဆိုရင် ယူနီကုတ်ကို ကျွန်တော်ပြောင်းသုံးမှာဖြစ်ပါတယ်။ ကျွန်တော့်ဆီကို ပုံစံအမျိုးမျိုး၊ နည်းလမ်းအမျိုးမျိုးသုံးပြီး အီးမေးလ်တွေ မပို့ကြပါနဲ့လို့ ပြောလိုပါတယ်။ ဒီလိုအီးမေးလ်တွေ အစောင်တစ်သိန်းလောက်ပဲပို့ပို့ မြန်မာတစ်နိုင်ငံလုံးက လူဦးရေ သန်း ၆၀ ကပဲပို့ပို့ ပြောင်းမှာမဟုတ်ပါဘူး။ နှောက်ယှက်တယ်လို့ပဲ သတ်မှတ်ပါမယ်။ ကျွန်တော်က ကျွန်တော်လုပ်နိုင်တာကို လုပ်ထားတာဖြစ်လို့။ ယူနီကုတ်သမားတွေလည်း လုပ်နိုင်တာ လုပ်ကြဖို့ နဲ့ လုပ်သင့်တာကို လုပ်ကြဖို့ ဒီနေရာကနေတိုက်တွန်းပါတယ်။

ဧရာ စာလုံးပြောင်း ကွန်ဗက်တာ

ဧရာ စာလုံးပြောင်း ကွန်ဗက်တာကို သုံး၍ လက်ရှိ လွှင့်တင်ထားပြီးဖြစ်သော WordPress အသုံးပြု ဝဘ်ဆိုဒ်များ၊ ဘလော့ဂ်များကို ယခုဖြန့်ချိထားသော့ WordPress မြန်မာဘာသာပြန်မူဖြင့် ပြောင်းလဲအသုံးပြုနိုင်ရန် ဒေတာဗေ့အားလုံးကို ပြောင်းလဲ၍ ရပါသည်။ ထိုသို့ပြောင်းလဲလိုပါလျှင် ပထမဆုံးအနေနှင့် သင့်ဘလော့ဂ် သို့မဟုတ် ဆိုဒ်ရှိ ဒေတာဗေ့အားလုံးကို သင့်ကွန်ပြူတာသို တင်ပို့ပေးရန်လိုပါသည်။

ထိုသို့ပြုလုပ်နိုင်ရန် နည်းလမ်းများကို ရှင်းပြပေးသွားပါမည်။

အဆင့် ၁ ။ ။ သင့် WordPress ဆိုဒ်၏ စီမံအုပ်ချုပ်မှုဆိုင်ရာ ထိန်းချုပ်ခလုပ်ခုံကိုဖွင့်ပါ။ အင်္ဂလိပ် ဗားရှင်းကို လက်ရှိအသုံးပြုထားလျှင် – tools -> export (မြန်မာဘာသာဖြင့် – ကိရိယာများ -> တင်ပို့ရန်) ကို သွားပါ သင့်တွင် WordPress export/import လုပ်သည့် ပလပ်အင် ထည့်သွင်းမထားရသေးပါက ပလပ်အင်ထည့်သွင်းရန် လုပ်ဆောင်ရမည့် အဆင့်များ ပေါ်လာပါမည်။ ထိုအဆင့်များကို ပြီးဆုံးအောင်လုပ်ပါ။ ပြီးလျှင် tools -> export တွင် သင့် ဒေတာဗေ့ကိုတင်ပို့နိုင်ပါပြီ။

အဆင့် ၂ ။ ။ တင်ပို့ထားသော ဒေတာဗေ့များကို http://add.ayar.co မှ ကွန်ပြူတာတွင် ထည့်သွင်း အသုံးပြုရသည့် ဧရာ စာလုံးပြောင်း ကွန်ဗက်တာ သို့မဟုတ် ဧရာ အွန်လိုင်း ကွန်ဗက်တာ ကို သုံး၍ လည်းကောင်း ဧရာယူနီကုတ်သို့ပြောင်းပါ။

အဆင့် ၃ ။ ။ ပြောင်းပြီးလျှင် tools -> import (မြန်မာဘာသာဖြင့် – ကိရိယာများ -> တင်သွင်းရန်) ကိုသွား၍ ဒေတာဗေ့ဖိုင်ကို ပြန်လည်တင်သွင်းနိုင်ပါသည်။

မှတ်ချက် ။ ။ အကယ်၍ ဒေတာဗေ့ကို ပြောင်းလဲရာတွင်လည်းကောင်း ပြန်လည်တင်ပို့မှု ပြုလုပ်ရာတွင်လည်းကောင်း အဆင်မပြေမှုများ အခက်အခဲများရှိပါက မြန်မာ့ပရက်စ်တွင် အကူအညီတောင်းခံနိုင်ပါသည်။
လိုအပ်ပါက မြန်မာ့ပရက်စ်မှ ကူညီ၍ ပြောင်းပေးမည်ဖြစ်ပါသည်။

ဧရာ ဝဘ် ကစ် အကြောင်း

ဧရာ ဝဘ် ကစ်သည် ယခု ဖြန့်ချိထားသော WordPress မြန်မာဘာသာပြန်မူ ဖြင့် တွဲဖက် သုံးရန် အကောင်းဆုံး ပလပ်အင်တစ်ခုဖြစ်သည်။ ဧရာ ဝဘ်ကစ်တွင် ဖောင့်မြှုပ်ထည့်သွင်းခြင်းကို အပြည့်အဝထောက်ပံ့ ထည့်သွင်းပေးထားသည်။ စီမံအုပ်ချုပ်မှုဆိုင်ရာ ထိန်းချုပ်ခလုပ်ခုံရှိ စာလုံးများကို ဧရာဖောင့်ဖြင့် ကောင်းမွန်လှပစွာ ဖော်ပြပေးနိုင်ရန် ပြုလုပ်ပေးထားသည်။ ထိန်းချုပ်ခလုပ်ခုံ၏ အရောင်တွဲစပ်မှုကိုလည်း မူလ WordPress တွင်ပါရှိသော မီးခိုးရောင်နှင့် အပြာရောင်အပြင် အစိမ်းရောင်သို့ပါ ပြောင်းလဲ အသုံးပြုနိုင်ရန် ပြုလုပ်ပေးထားသည်။ ထိန်းချုပ်ခလုပ်ခုံတွင် ဖော်ပြထားသည့် WordPress တံဆိပ်နေရာတွင် စိတ်ကြိုက် တံဆိပ်တစ်ခုပြောင်းလဲထည့်သွင်းပေးနိုင်သည်။ လွှင့်တင်ထားသော ဆိုဒ် ရှေ့စာမျက်နှာများတွင် မှတ်ချက်ပေးသည့်နေရာတွင် TinyMCE Editor ကို အသုံးပြုနိုင်ရန် ပြုလုပ်ပေးထားသည်။ ထို အယ်ဒီတာတွင် မိမိကွန်ပြူတာ၌ စာရိုက်စနစ်များ၊ ဖောင့်စာလုံးများထည့်သွင်းထားရန်မလိုပဲ ဧရာစာလုံးကို အသုံးပြု၍ တိုက်ရိုက် ရိုက်သွင်းရေးသားနိုင်သည့် စာရိုက်စနစ်ပါထည့်သွင်းပေးထားသည်။ WordPress ကို အသုံးပြုထားသည့် ဆိုဒ်တစ်ခုလုံးရှိ စာရိုက်သွင်းရန် နေရာများအားလုံးကို ထိုလက်ကွက် စာရိုက်စနစ်ဖြင့် အသုံးပြုရိုက်နှိပ်နိုင်သည်။ ဤ ဧရာဝဘ်ကစ်ကို အသုံးပြုထားပါက မည်သည့်နေရာ၊ မည်သည့်အချိန်၊ မည့်သည့်ကွန်ပြူတာမှ မဆို မြန်မာစာကို ကောင်းမွန်စွာ ဖတ်ရှု ရေးသားမှုများပြုလုပ်နိုင်ပါသည်။ ထို့ပြင် ဧရာအွန်လိုင်းအယ်ဒီတာကို အသုံးပြုရန် ဖွင့်ထားပေးပါက မိမိ အဓိပ္ပါယ်သိရှိလိုသော စကားလုံးကို ကလစ်နှစ်ချက်နှိပ်သည်နှင့် ပေါ့အပ်ပွင့်ထွက်သော ဝင်းဒိုးတစ်ခုဖြင့် ထိုစာလုံး၏ အဓိပ္ပါယ်ကို ဖော်ပြပေးမည်ဖြစ်သည်။ ဧရာဝဘ်ကစ်ကို ဒီမှာရယူနိုင်ပါသည်။ အသေးစိတ် သိလိုသည်များရှိပါက မြန်မာ့ပရက်စ် တွင် မေးမြန်းနိုင်ပါသည်။